LF2 liga gogorrari neurria hartzen ari zaio marea morea. Bostetik bi garaipen poltsikoratu dituzte dagoeneko. Gaurko aurkariak lautik lau porrot pilatuta egin die bisita eta berebizikoa zen, morala altu mantentzeko, Iturripen duela bi aste Andratxen aurka lortutako garaipenari jarraipena ematea gaur.
Ausart eta gogor sartu dira partiduan Arrasatekoak, erritmo biziarekin jokatuz, bai erasoan eta bai defentsan. Erritmo altu horrek baldintzatuta bizkaitarrek ez dute asmatu jaurtiketetan eta horrek konfiantza eman dio MUri baloia nahi bezala mugitzeko.
Bigarren laurdena 20-8ko markagailuarekin hasi dute, eta alde hori mantentzeko gai izan dira laugarren laurdenera arte, gorabeherekin. Izan ere, minutuak aurrera joan ahala intentsitatea jaitsi dute etxekoek, erraztasun handiagoarekin utzi diete aurkariei saskiratzen, baina larritu barik, kontzentratuta jarraitu dute erasoan, seriotasunez.
Azken minutuetan gora etorri dira bisitariak, sinistu egin dute berdinketan. Urduritasun puntu bat igarri zaio Ointxe!-ri. Gainera, kolpea hartu du fin jokatzen zebilen Bentancourtek. Eskerrak ez den ezer larririk gertatu. Taldeak gehien behar zuenean itzuli da kantxara, 66-62 zeudenean. Bi jokalditan bost puntu sartu eta arnasa eman die taldekideei. Minutu pare bat geratzen ziren partidua bukatzeko, eta azken segundoetan sufritu barik egin ahal izan diete aurre galdakoztarrei.
Garaipen baltsamikoa izan da, ezbairik gabe. Datorren asteburuan Mataró-n, Bartzelonan, saiatuko dira etxetik kanpo lehen aldiz irabazten.
