"Gaur gaurkoz, Arrasaten etxe bat alokatu edo erostea ez dagoela edonoren esku", adierazi du Maider Morras alkateak eta zera gaineratu: "Etxebizitza eskubide bat da, eta gaur egungo espekulazioari muga jarri beharra diogu gizarte bezala. Uste dugu Arrasatek gune tentsionatua izendatzeko baldintzak betetzen dituela eta lan horretan hasiak gara dagoeneko”.
Izendapenaren lehen urratsa, azterketak egitea
Etxebizitzari buruzko diagnosi bat, tentsio eremu gisa izendatutako eremuan hautemandako desorekak zuzentzeko inplementatuko diren neurri zehatzen ekintza plan bat, eta biztanleen beharrak asetzeko adina etxebizitza ez dagoela arrazoituko duen memoria sortuko ditu Udalak.
Etxe hutsen analisia egiten ari dira
Azken analisia 2012koa da, eta, ordutik, egoera oso bestelakoa da, "horregatik, analisi hori eguneratzea ezinbesteko ikusten dutela" azaldu du alkateak. Helburu horrekin, "behin behineko kontratazioa egin dela" gaineratu du, eta "dagoeneko langile bat ari dela diagnosia eta herrian dagoeneko eginda dauden etxebizitzen eta haien erregimenaren inguruko azterketa egiten, etorkizunean planeamendu berriak eskaini beharko dituen etxebizitza berrien nolakotasuna definitzen laguntzeko".
