Beldurra da antzezlanaren gai nagusia; sortzaileen hitzetan, modu berezian kontatuta: "Txikitan garatu eta helduak garenean mantentzen diren beldurrei buruz hitz egin nahi dugu. Beldur horiek gure inkontzientean itsatsita eta gure eguneroko bizitza egiterakoan lokarturik daude, baina, usain, irudi edo, kasu honetan bezala, ukitu batek esnatu ditzake".
Jolasetik eta umoretik garatuko dute kontakizuna, mundu erreala eta mundu imajinarioa uztartuta. Zuzeneko musika izango da bi munduen arteko lotura. Leire Orbe eta Maite Fombellida aktoreek gorpuztuko dituzte pertsonaia nagusiak –kutxak antolatzen jarduten duten langileak–.
