Estibaliz Arroyo sopranoa, Julen Garcia baritonoa eta Arkaitz Mendoza pianista izan zituen lagun Aitor Garitano tenore bergararrak Ozenki elkarteak atzo egindako Lirika gaztea emanaldian. Eserleku gutxi gelditu ziren hutsik JAMEko auditoriumean, eta ia hogei piezako errepertorioa eskaini zuten musikariek. Didaktikoa ere izan zen emanaldia; izan ere, ikuskizunak keinu egin zion Giacomo Puccini musikagile italiarraren heriotzaren mendeurrenari.
La Boheme, Tosca edo Madame Butterfly operen sortzaileak berak hitz egin zien ikusleei, Ekaitz Gonzalez de Urretxu aktoreak egindako interpretazio lanean. Umoretsu, Puccinik egindako ibilbidearen eta sortutako pieza esanguratsuenen errepaso laburra egin zuten emanaldian.
Opera eta zarzuela nagusiki
Opera pasarteekin osatu zuten egitarauaren tarterik handiena, eta Pucciniren bost obra eskaini zituzten musikariek. Mozarten, Rossiniren, edota Barbieriren obrak ere entzun ziren, ordea, eta zarzuela ere bai; Guridiren El Caserio eta Alonsoren Me llaman la presumida zarzuela obretako piezak, besteak beste.
Aitor Garitanok duen kalitatea erakutsi zuen. Besteak beste, Rossiniren L’Orgia obrako aria bat, Verdiren La Traviata operaren duo bat eta Soutulo eta Vert-en El ultimo romantico obraren Bella enamorada romanza interpretatu zituen. Francisco Alonsoren Me llaman la presumida zarzuelako habanera ere bikain abestu zuen.
Gala lirikoa abenduaren 18an
Lirika gaztea emanaldiko aurkezpenean jakinarazi zuen Ozenki elkarteko Manu Gallardok Arrasateko urteroko gala lirikoa abenduaren 18an izango dela aurten. Opera 2001 taldearen eskutik etorriko da eta tartean izango da Pucciniren heriotzaren mendeurreneko ekitaldien barruan Italian egin den txapelketako irabazlea: Yeonjoo Park soprano korearra.
