Arrasateko EAJ-PNVren ustez, plangintza faltak atzerapenak ekarri ditu. "Esaterako, barruko igerilekua ezin izango da garaiz ireki obren atzerapena dela eta. Horrez gain, atletismoko pista berritze lanak ere atzerapen handiekin doaz, klub eta erabiltzaileentzako arazoak sortuz".
Hala, "erabiltzaileak eta klubak erdigunean jartzea" eskatu diote Udal Gobernuari, hobekuntzak behar bezala planifikatzeko eta obrek kirol jardunarekin bat ez egiteko. "Adibide onenak joan den legealdiko atletismo pistaren eta errugbi zelaiaren aldaketak dira, ez baitziren batera egin klubek beren instalakuntzetatik kanpo ahalik eta denbora gutxien pasa zezaten".
Horregatik, plangintza bat egiteko eskua luzatu diote Udal Gobernuari, "obrak noiz esleitu, noiz egin eta instalakuntzak noiz egongo diren erabilgarri argi eta garbi ezartzeko, klubak eta erabiltzaileak erdigunean jarriz". Era berean, nabarmendu dute "prestutasun osoa" dutela kirol batzordean lanketa hori "seriotasunez egiteko eta plangintza bat ezartzeko".
