Bi berrikuntza nagusi ageri dira Arrasateko Udal Bibliotekaren ikasturte honetako egitarauan: euskarazko komiki kluba, eta idazketa tailerrak.
Iazko gaztelerazko komiki klubak "arrakasta" izan zuela-eta, hura aurten bigarrenez antolatzearekin batera, euskarazkoa sortzeko pausoa eman dute programatzaileek. Euskarazko taldea Igor Leturiak gidatuko du, otsailaren 12 eta maiatzaren 14a bitarte. Gaztelerazkoa, berriz, Azucena Mongek urriaren 16tik eta urtarrilaren 15era. Elkarguneok komiki-irakurleek aldez aurretik irakurritako komikiak komentatzeko helburua dute.
Idazketan trebatu nahi dutenek ere izango dute formaziorako aukera, euskaraz zein gazteleraz. Gaztelerazko tailerrei dagokienez, oinarrizko zein sakontze mailako tailerrak izango dira; euskaraz, berriz, sakontze mailakoa.
Solasaldiei dagokionez, oraingoan ere, literatura solasaldiak eskainiko ditu Bibliotekak, euskaraz, gaztelaniaz eta ingelesez. Guztira 22 solasaldi antolatu dira, ikasturte osoan banatuta.
Izen emateak irailaren 16tik 22ra
Jarduera hauetan izena emateko epea irailaren 16tik 22ra izango da. Kontsultatu informazio guztia azpian erantsita dagoen esku-orrian edota udal bibliotekaren webgunean.
