Kontzertu batekin irekiko du Emakume Txokoak udazkeneko egitaraua, irailaren 20an, Monterron parkean. Izan ere, Giza zarata disko berria aurkeztuko du Anari musikariak, 20:00etan, bere ohiko bandarekin. "Barrura zein ingurura begira jartzeko kantuak osatu ditu disko berri honetan eta feminismoaz, kapitalismoaz edota klima aldaketaz hitz egiten du bere abestietan", diote Emakume Txokotik.
Aurrez, baina, Anixe, Claudia Diaz eta Izadi Zumalde ariko dira oholtzan, 19:00etan hasita. "Musika estilo eta ibilbide ezberdinetako emakume musikariak elkarrekin jarri nahi ditugu taula gainean. Jada euskal musika eszenan erreferente bilakatu den Anarik urratutako bidetik, ibilbidea egiten ari diren neska gazteak ere gogoz eta kemenez datoz bide berriak lantzen. Euren lanak ezagutzeko, eskaintzeko eta partekatzeko aukera sustatu nahi du ekimen honek".
