Aurten ere musika emanaldi akustikoek Arrasate hartuko dute, Oreixe Akustikoa musika zikloaren XVI. edizioaren bitartez. Irailaren 6tik 15era izango dira aurtengo emanaldiak, sei guztira. Kontzertu guztiak Juan Arzamendi Musika Etxeko (JAME) Auditoriumean izango dira, 19:30ean hasita. Sarrerak salgai daude dagoeneko, eta Arrasateko Udalaren atarian eskuratu daitezke, 5 euroren truke.
Egitaraua
- Irailaren 6an Yo Diablo bikote valentziarra egongo da. Hauen musika bluegrass, surf rock, deep blues eta rockabilly psikodelikoaren arteko nahasketa da bat da.
- Irailaren 7an Ekhi Lambert Irulegiko konpositore eta kantautorea da. Influentzia desberdinak elkartuz, besteak beste, herrikoia; pop-a; musika inpresionista eta filmetako musika, interpretazio eta idazkera musikalaren norberako ikusmoldea aldarrikatzen du Lambertek.
- Irailaren 8an Habia hirukotearen txanda izango da. Ipar Euskal Herriko taldeak hiru ahots eta hiru hari elkartzen ditu, tradiziotik abiatuta sorkuntza berriak jotzeko.
- Irailaren 13an Maria eta Micu ahizpek osatutako Las Nietas del Charli taldea egongo da ikusgai. Ahotsek eta gitarrak osatzen dute hauen musika.
- Irailaren 14an Erromintxelak taldea taularatuko da, 2021ean Arrasaten sortutako taldea. Euskaraz sortutako abestiak eta instrumentu akustikoak uztartuz, swing eta gipsy musika egiten dute.
- Irailaren 15ean Karmento, Mantxako artista folklorikoa, izango da JAMEn. Neofolklore espainiarraren izen garrantzitsuenetako bat da Karmento, eta berau arduratuko da jaialdia ixteaz.
