Guztira 170 lagunek hartu dute parte Arrasateko seigarren enduro txapelketan. Aurtengoa, gainera, Sustrails Openerako puntuagarria izan da eta Frantziatik eta Italiatik etorritako parte-hartzaileak ere izan dira. Helmugara iristen azkarrenak, baina, debagoiendarrak izan dira. Markel Uriarte –Aretxabaleta–, Aritz Ibabe –Aretxabaleta–eta Iker Senar –Aramaio– izan dira lehen hiru sailkatuak.
Zortzi kategoria egon dira, bi, bizikleta elektrikoan, eta ibilbidea zein den gaur jakin dute parte-hartzaileek. Sekretupean izan dute antolatzaileek; atzo gauean ibili ziren markatzen. Guztira lau tarte izan ditu. Lehen biak ezagunak ziren –ospitale atzekoak–, aurreko urteetan ere pasatu direlako bertatik –Bakuetik Zubillagara lehen tartean, eta handik Arrasatera berriz, Kurtzetxikira igo eta buelta ospitalera bigarren zatian–, baina hirugarrena eta laugarrena berriak ziren; anporretan izan dira biak. Batez ere laugarren tartea gustatu zaie parte-hartzaileei, saltoak egiteko tarteak zituelako.
Lasterketa bukatu dutenerako parrilla martxan zuten antolatzaileek, txosna irekita eta bizikletak garbitzeko txokoak, gertu.
