Irailaren 14an hasiko da Gipuzkoako Bertsolari Txapelketa, eta 48 bertsolari arituko dira bertsotan. Hamasei saio izango ditu guztira, eta Urretxun izango da lehena: zazpi final zortziren, bost final laurden, hiru finalaurreko eta finala. Finalaurreko azkeneko saioa, gainera, Arrasateko Uarkape pilotalekuan izango da abenduaren 1ean; orduan jakingo da nortzuk igaroko diren abenduaren 14an Donostian jokatuko den finalera, eta sarrerak dagoeneko salgai daude.
Hain justu, gaur eman dute txapelketaren berri, prentsaurrekoa egin baitute Gipuzkoako Foru Aldundiaren egoitzan. Han izan dira Asier Azpiroz Gipuzkoako Bertsozale Elkarteko lehendakaria eta Goizane Alvarez Kultura, Lankidetza, Gazteria eta Kirol diputatua.
Bertsolari debagoiendarrak
Bailarako ordezkaritzari dagokionez, sailkapen fasean aritu ziren bederatzi bertsolarietatik bostek eskuratu dute txapelketarako txartela: Ane Zuazubiskar Iñarra arrasatearrak irailaren 14an izango du saioa, Urretxun; Oihana Arana Cardenal eskoriatzarrak, berriz, irailaren 21ean, Lazkaon; gainontzeko hiruek, azkenik, Aitor Tatiegi Loidi eta Maider Arregi Markuleta oñatiarrek, eta Haizea Arana Cardenal eskoriatzarrak urriaren 5ean, Azpeitian.
