San Juan jaiekin gozatzeko aukerarik ez dutenek Goienaren bitartez izango dute gertatzen denaren berri jakiteko aukera; izan ere, jarraipen zabala egingo zaie Arrasateko jaiei aurten ere Goiena telebistan eta Goiena. eus atarian. San Juan bezperan hasita, makalaren igoera (17:45) eta errementari dantza (21:00) kaleetan zehar zuzenean jarraitu ahalko da, Goiena.eus-en; San Juan sua ere (22:15) zuzenean emango da webgunean eta telebistan. Ondoren, danborrada ere ikusi ahalko da Goienaren webgunean.
Entzierroek ere jarraipen berezia izango dute; izan ere, ekainaren 24an, 25ean eta 26an, 08:55ean, zuzenean eskainiko dira Goiena.eus-en eta Goiena telebistan; baita ondorengo bigantxak ere. Hori gutxi balitz, jaietako astelehenean, hilak 24, Hemen Debagoiena jaietan saio berezia egingo da 18:00etan, 20:00etan eta 22:00etan; hilaren 26an, berriz, San Juan jaien gaineko Jaiak programa berezia eskainiko da Goiena telebistan, 21:00etan eta 23:00etan.
Bi pantaila
San Juan bezperan herritarrek ere jaien bueltan gertatzen dena herriko kaleetan ikusteko aukera izango dute, bi pantaila erraldoi jarriko direlako: bat plazan eta bestea txosnagunean. Plazakoa 17:45ean piztuko da, makalaren igoerarekin batera, eta errementari dantza kalean (21:00), San Juan sua (22:15) eta danborrada (23:15) ere bertan ikusteko aukera egongo da. Txosnaguneko pantaila, aldiz, errementari dantzaren hasierarekin piztuko da.
EITBrekin elkarlana
Iaz egin bezala, aurten ere Goiena telebistak eta EITBk elkarlanean emango dute San Juan suaren piztuera eta, besteak beste, dantza ikuskizunak, zuzenean, Herriko Plazatik. 22:15ean hasiko da Ilaski Serranok –EITB– eta Txomin Madinak –Goiena– gidatutako saioa. Bi kazetari horiez gain, Larraitz Zeberio –Goiena– arituko da plazan gertatzen denaren berri ematen eta protagonisten ahotsak eta iritziak jasotzen.
