Ekainaren 6an, eguena, jam session bat egingo dute, Arrasate Blues jaialdirako motorrak berotzekoaz gain, herriko artistei garrantzia eman eta Arrasateko kaleetan giroa sortzeko helburuarekin.
Zigor Martinezek zuzenduko du saioa, Arrasate Musikal Big Bandeko zuzendariak. Bere alboan, Arrasate, Aretxabaleta eta Eskoriatzako hamabost bat musikari ariko dira. "Batzuk oso gazteak dira, eta dagoeneko instrumentuekin duten trebetasuna erakutsiko digute", azaldu dute antolatzaileek.
Gaineratu dutenez, jam session bat musika-inprobisazioko topaketa informal bat da, "musikarien gozamenerako topaketa bat, non idatzi eta entseatu gabeko musika jotzen duten, bakarkako desberdinak egiten dituzten eta abar. Iaz Arbolapetan haien lan onarekin liluratu gintuzten".
