Lore Gazteak dantza taldeak Arkupeien dantza sorta eskainiko du datorren egubakoitzean, maiatzaren 24an, Arrasateko gaiteroekin, haiek sortutako doinuetan oinarritutako bost dantza egingo baitituzte: Iturriotzetik, Kinka, Haban, Joka eta Arkupeien. "Gure herrian dantzatu ohi diren eta izenean paloteado moduan ezagunak diren dantzen antzeko eskema bat jarraitzen du dantza sorta honek: paseo edo pasacalle rigidon tenpoa, Habanera, Vals, Jota eta 6/8ko bezalako erritmoak dituzte oinarritzat".
Iturriotz kalean ekingo diote emanaldiari 19:30ean, eta beherantz egingo dute Iturriotzetik izena duen dantza dantzatuz Portaloira arte; han egingo dituzte gainontzeko dantzak. Hala, herritarrak gonbidatu dituzte parte hartzera, mezu batekin: "Lanean jarraituko dugu egiten dugunak iraun dezan, gaudenongatik eta lan horrekin jarraituko dutenengatik".
