Udaberri Musikaleko bigarren aste bukaera izan da honakoa, eta asko itxarondako emanaldia egin dute Arrasate Musikaleko Orkestra Sinfonikoak eta Goikobalu Abesbatzak. Bete egin da San Frantzisko eliza, eta izan da emanaldia zutik jarraitu behar izan duenik ere.
Errepertorio exijentea aukeratu dute orkestrako zuzendari Iker Olazabalek eta abesbatzako zuzendari Iñaki Maidaganek, baina musikariek maila eman dute eta entzuleei ez zaie oharkabean pasa; gogoz egin dute txalo.
Bi zati izan ditu kontzertuak
Orkestrak eman dio hasiera kontzertuari. Franz Schubert-en zortzigarren sinfonia jo dute eta ondoren Kenneth Leightonen Introduction and March finale. Ondotik gehitu dira abesbatzako kideak. Ahotsa jarri diote Gabriel Faureren requiemari. Kontzertuari amaiera emateko, Juan Arzamendiren Udalamendi abestia eskaini dute; Arzamendi hil zela hogei urte igaro dira, eta omenaldia egiteko modua izan da.
Bideo honetan, Gabriel Faure musikariaren Introit et Kyrie pieza duzue entzungai.
