2023ko urrian lan-baldintzak eguneratzeko eskaria egin eta bakarra onartzeagatik, Merkal Calzadoseko langileek greba deitu zuten apirila erdialdean: Gipuzkoako zortzi dendetatik sei batu dira grebara. Apirilean ekin zioten bariku eta zapatuetako grebekin; ostiralero Oiartzunen elkartzen dira Merkal Calzadoseko bulego azpian, eta zapatuetan aldiz herri desberdinetako denden aurrean egiten dute elkarretaratzea, gaurkoan Arrasaten.
"Lan baldintzak hobetzea eskatzen dugu: 36 orduko atsedenaldi etengabea eta jai ditugun bi zapatuak zeintzuk izango diren guk aukeratzeko ahalmena izatea besteak beste", dio Mirari Osinalde dendako arduradunak. Pasa den astean bilera bat egin zuten arren oraindik ez dira akordio batera iritsi: "Aurreko astean egindako bileran aurrerapen txiki bat ikusi genuen, baina ez nahikoa.
Horregatik greban jarraituko dugu". Oraingoz, maiatzeko azken asteburu arte jarraituko dute greban Merkal Calzadoseko langileek.
