Bereziki ekainean emango dituzte Arrasate Musikaleko taldeek kontzertuak, baina maiatzerako ere programatu dituzte hainbat hitzordu; guztiak, Udaberri Ziklo Musikalaren baitan. Lehen emanaldia maiatzaren 5ean izango da, domeka, 12:30ean, Juan Arzamendi Musika Etxeko auditoriumean. Arrasate Musikaleko Txistulari Bandako kideak igoko dira oholtzara, eta dozena inguru pieza joko dituzte, Juan Karlos Larreategik zuzenduta.
Hainbat nobedade
Antolatzaileek berrikuntzak txertatu dituzte egitarauan; esaterako, maiatzaren 17ko ate irekiak, gurasoei eta haurrei zuzenduta. "Izan ere, lehen aldia da egungo egoitzan halako jardunaldi bat antolatzen duguna", adierazi du Edorta Ayastuy komunikazio arduradunak. Bestelako ekitaldien artean, ekainaren 7an Debagoieneko hari musika-tresnen topaketa eta hurrengo egunean Euskal Herri mailako klarinete topaketa egingo dituztela aurreratu du.
