Bi jardunaldi besterik ez zaie gelditzen Mondragon Unibertsitatekoei liga erregularra amaitzeko, eta asteburu honetan lauko finalerako txartela eskuratu dezakete, Ibarra kiroldegian La Salleren aurkako partidua irabaziz gero, domekan, 18:00etan.
Aste Santu aurreko bi porroten ostean, bolada onari eutsi diote berriro Iñaki Ogararenek, hiru garaipen jarraian erdietsita; Donostiako La Salle taldearen –sailkapeneko bosgarrena– bisita izango dute asteburuan, Ogararen hitzetan "final bat" izango den partiduan. La Sallek baino garaipen bat gehiago dute arrasatearrek bi jardunaldiren faltan, eta, joaneko partida bi punturen aldearekin irabazi zutela jakinda, garaipenarekin lauko finalerako txartela lortuko lukete. Ogarak dio "hil edo biziko partidua" izango dela eta garaipena taldeak egindako merituei aitortza izango litzatekeela: "Taldeak egin duen denboraldi izugarria da eta meritu guztiak egin dituzte denboraldia borobildu eta saria eskuratzeko".
