Uztailaren 18tik 21era egingo da Arrasate Blues jaialdiaren seigarren edizioa, Ibai Artek antolatuta, Udalaren laguntzarekin, "herriko kaleak musikarik onenaren agertoki" bilaka daitezen. Berrikuntzatzat, gainera, antolatzaileek adierazi dutenez, jaialdia erdigunetik harago zabaltzea dute xede, eta, hala, Arimazubi eta Musakola inguruetara iritsiko da lehenengo aldiz.
Hamalau emanaldi egiteko hamar agertoki izango ditu jaialdiak, eta emakumezkoek eginiko musikari eman nahi diote garrantzia antolatzaileek; diotenez, "bluesak andreen ahotsa" du, baina gero eta gutxiago dira: "Hori dela eta, indarra hartzen ari den emakumeen talentuaren aldeko apustuari jarraituz, Arrasate Bluesek berriro hautsi ditu moldeak, eta seigarren edizio honetan 11 emakume igaroko dira Arrasateko agertokietara". Hain justu, horien artean dago, esaterako, soilik andrez osatutako Vulcanizadas musika taldea; baita Finlandian jaio eta hazia den Ina Forsman ere.
Bertako bluesa
Jaialdiak "bertakoaren aldeko apustua" egiten duela azaldu dute antolatzaileek, eta uztailaren 19an, egubakoitza, beraz, bertako musikariak arituko direla oholtza gainean arratsaldetik aurrera: Zerendepya, The Allnighters eta Arima Soul.
