Lehenengo aldia izan du aurtengoan Lilabide martxak, eta dozenaka emakume elkartu dira. 11:30ean hasi dute ibilbidea parte-hartzaileek, Biteri plazatik, eta ordubeteren ondoren iritsi dira Herriko Plazara, 12:30ean. "Oso gustura egon gara. Jende askok hartu du parte, baita ezagutzen ez genuenak ere. Datorren urtean esperientzia apur bat gehiago izango dugu egitasmo bera antolatzeko", adierazi du Marije Etxebarria Sasoibideko kideak eta martxaren antolatzaileak.
Parte hartzaileetako hiruk, gainera, aipamen berezia jaso dute ibilbidea egiten helduenak izateagatik: Feli Etxebarriak, 1936an jaioa; eta Angelines Castellanok eta Maria Jose Gilek, 1940an jaioa. Hain justu, diploma bana jaso dute Maider Morras Arrasateko alkatearen eta Eva Abuin Elkarrekin Arrasateko zinegotziaren eskutik. "Ez genuen horrelakorik espero, baina pozik gaude; hunkitu ere egin gara", adierazi dute hiru omenduek.
