Gipuzkoako mendi federazioak bultzatuta bost herri desberdinetan ibilaldi neurtua antolatu da gaurko egunerako. Besaide Mendizale Elkartea izan da aurten ekintza honen antolatzailea, eta Kurtzetxiki eta Bedoña inguruetara bi ibilbide desberdin eskaini diete animatu diren debagoiendarrei, biek Arrasateko Kulturola aterpean izan dute hasiera eta amaiera.
Olatz Igartua Besaide Mendizale Elkarteko presidentearen hitzetan, "mendizaletasun geldoa bultzatzeko" ekimena da, hau da, "lagunekin oinez joan eta paisaiaz gozatzeko" helburua duen ekintza da.
"Arazorik gabe"
"Prebisio guztiaren gainetik oso ondo joan da eguna, parte hartzaileek adierazi digutenez oso gustura aritu dira eta ez da inongo arazorik egon", dio Olatz Igartuak. Izan ere, euri zaparradak protagonista izan diren aste honetan, "espero baino eguraldi hobea" izan dutela aitortu du eta astea "urduri" pasa duten arren, ekintza burutzea lortu dute.
