Osakidetzak lehiaketara atera du Debagoieneko Ospitalearen eraikin berria egiteko obren lizitazioa, Eusko Jaurlaritzako Osasun Sailak jakinarazi duenez. "Bloke berri honetan, osasun-baliabide modernoa eskainiko zaio eskualdeari, eta eskualdeko 63.000 biztanleen premiei erantzungo dien zerbitzu-zorro zabala eta eguneratua izango du". Hain justu, zehaztu duenez, bloke berrian kokatuko dituzte, besteak beste, eguneko ospitale mediku-kirurgikoa, erresonantzia magnetiko nuklearreko zerbitzua, endoskopia unitatea, medikuntza fisikoko eta errehabilitazioko eremua eta larrialdiak.
Hala, asmoa da lanak ekainetik aurrera hastea, eta 30 hilabeteko epean gauzatzea aurreikusten dute. "Horretarako, 29 milioi euro inguruko inbertsioa egingo da, eta horri altzarien eta ekipamenduaren zenbatekoa gehitu behar zaio".
Eraikinaren xehetasunak
Eraikinak 9.300 metro karratuko azalera izango luke, bost solairu eta bi sotorekin, eta bloke berriak zuzeneko konexioa izango du kanpoko kontsulten eraikinarekin. Unitate jakinez gain, gainera, Osasun Sailak azaldu du "zerbitzu osagarriak eta administratiboak" ere izango dituela eraikinak, eta solairu bat "erreserban" geldituko dela, "osasun asistentzian sortzen diren premietara egokitu ahal izango dena".