Nell Leyshonek 2019an idatzitako izen bereko liburuan dago oinarrituta Tanttaka Teatroren azken lana, Esnearen kolorekoa (domeka, 19:30, Amaia antzokia). XIX. mendeko nekazaritza giroko Ingalaterrako baserri batean bizi den neskato bat du protagonista.
Aitziber Garmendia da Mary. Harekin batera egongo dira oholtza gainean Mireia Gabilondo eta Jon Olivares bergararrak, Miren Arrieta, Joseba Apaolaza eta Jose Ramon Soroiz. "Oso gustura gaude orain arte egindako bide laburrarekin. Istorio oso polita da eta ikusleek ondo jaso dute", esan du Gabilondok.
Pertsonaia bereziak egongo dira oholtza gainean, urtaroen eta baserriko lanen konpasean isurtzen den ingurune bukoliko batez inguratuta. Maryren (Aitziber Garmendia) ahaleginari esker, beste pertsonaia guztiek izango dute zentzua istorio horretan.
Arrasate Musikal
Domekako antzezlanaz gain, egongo dira beste aukera batzuk kultura kutsuarekin Aratusteez gozatzeko. Arrasate Musikalek emanaldi bikoitza egingo du asteburuan. Gaur, barikua, ohiko duten Aratuste kontzertua egingo dute, 18:30ean, Amaia antzokian. Eskolako hainbat taldek parte hartuko dute eta, guztira, 100 bat musikari pasako dira eszenatokitik, askotariko piezak interpretatzeko. Sarrera debalde da.
Bihar, zapatua, Arrasate Musikaleko Big Band Txarangaren txanda izango da. Kalerik kale ibiliko dira, herritarrak dantza egitera animatzeko. Big Band taldeak urteak daramatza txaranga-lanak egiten ospakizun zehatz batzuetan.
Pailazo emanaldia
Asteburuaren ostean, Aratuste-martitzena ere indartsu etorriko da. Bereziki, neska-mutikoendako hainbat hitzordu egongo dira. 17:00etan, disko festa egongo da, Txatxilipurdiren eskutik, Biteri plazan, eta ordu berean, pailazo emanaldia Amaia
antzokian. Tomaxen Abenturak taldeak Azken festa ikuskizuna egingo du. Tomaxen eta Muxiren azken urtea izango da hauxe, eta urte hauetan guztietan egindako ikuskizunetako pasarte onenak batu dituzte, agurtzeko.
Aratusteetako azken orduetan musika izango da protagonista herriko kaleetan. Samasiku txarangaren kalejira 17:30ean, erraldoi eta kilikien kalejira 18:30ean eta Nemux taldearen disko festa 19:30ean. Azken ekitaldia sardina-ehorzketa izango da, gaueko bederatzietan, Herriko Plazan.
