Antiak aditzera eman du epaimahaiko kideak bitan pasatu direla tabernatik tortillak probatzera, eta jasotako puntuei esker Gipuzkoako finalean izango da. Bi tortilla mota aurkeztu ditu; bata, patatekin bakarrik egindakoa, eta bestea, bakailao eta Gernikako piperrekin. Lurraldeko finalean hamar egongo dira lehian, eta horietatik hiru hautatuko dituzte martxoaren 9an Bilbon jokatuko den finalera joateko. Gipuzkoako epaimahaiko kideen artean sukaldari adituak izango dira, besteak beste, Martin Berasategi, Pedro Subijana, Hilario Arbelaitz eta Pablo Loureiro.
Antiak adierazi duenez, finalista izatearen berria "pozik eta ilusioz" hartu du. Tortillen sekretuaren gainean galdetuta, ezin duela horren berri eman adierazi du. Tipularik izan behar duen edo ez eztabaidaren aurrean, ostera, erantzun argia eman du: "Patata-tortilla, berez, tipula barik da; gero, bakoitzak erabakitzen du zer egin, baina izatez ez zaio tipularik bota behar".
