Ohi moduan, Musakolan hasiko du ibilbidea ludoteka ibiltariak, baina aurten elkargune berria izango du auzo horrek. Hala, institutuko patioan batuko dira. "Hezitzaileen laguntzarekin eta askotariko material zein baliabideak parte hartzaileen eskura jarriz, bi orduz ludotekaz gozatzeko aukera egongo da", azaldu dute Txatxilipurditik.
3 eta 12 urte arteko haur eta aurre-nerabeek parte hartzeko aukera izango dute ekimenean, baita horien arduradun edo gurasoek ere. "Ekintzak, parte hartzaileekin batera adostu eta denen gustukoak antolatzen saiatuko gara", nabarmendu dute. "Aisialdi hezitzaile euskaldunaz gozatzeko aukera paregabea da ludoteka ibiltaria. Parte-hartzaileei sormena garatzeko, harremanak egiteko, parte-hartzea sustatzeko, naturarekin harremanak egiteko eta beste hainbat helburu hezitzaileri bide emanez".
Azkenik, azpimarratu dute parte-hartzea librea izango dela. "Askatasunez jolas egiteko gunea eta laguntza eskainiko da, betiere, euskaraz!". Zapatuetan 11:30etik 13:30era gauzatuko dute ludoteka ibiltaria.
Honako hau da egutegia:
- Musakola auzoan: otsailak 3, 17 eta 24.
- San Andres auzoan: martxoak 2, 9, 16 eta 23.
- Erguin auzoan: apirilak 13, 20, 27 eta maiatzak 4.
