Palestinar Erresistentzia Eguna ospatuko dute otsailaren 3an, zapatuan, Arrasaten, eta, egunari hasiera emateko, hitzaldi bat izango dute, 11:00etan: Al Yudur eta Samidoun mugimenduetako kide den Taher Ali izango da hizlaria. Hain justu, Palestinako askapena jomugan duen gazte palestinarren antolakundea da Al Yudur, eta helburu dute euren identitatea mantentzea. Palestinatik kanpo jarduten dutenek osatzen dute mugimendua, esate baterako, erbestean jaio diren eta Palestinako errefuxiatu eremuetatik iritsi diren herritarrek. Samidoun, berriz, preso palestinarrekiko elkartasun sare bat da.
Hitzaldia, ordea, ez da goizeko ekintza bakarra izango, mural margoketa egingo baitute 12:30ean. 14:30ean, berriz, bazkaria izango da, eta dagoeneko izena eman daiteke Iluntz tabernan; azkenik, egunari amaiera emateko, DJ Tasaund System arituko da musika jartzen gaztetxean, 23:00etatik aurrera.
Ekintza guztiak gaztetxean egingo dira, eta egun horretan lortzen den dirua Palestinako herriaren aldeko borroka finantzatzeko izango da.