Iskanbilako kide Iban Gonzalezek nabarmendu du "oso gustura" aritu zirela bart oholtza gainean. "Arrasateko gaztetxea ezin aproposagoa da halako kontzertuetarako, bai tamaina eta bai leku aldetik. Gure herrian jotzea, sentimentalki, oso indartsua izan zen guretzat".
Halaber, belaunaldien arteko nahasketari ere balioa eman nahi izan dio: "Musakolan jo genuenean ere, lehenengo lerroan oso jende gaztea zegoen eta laugarren lerrotik atzera, jende heldua. Nahasketa horrek ilusio handia egiten digu".
Horrez gain, Arrasateko taldeekin jotzeak ere badu garrantzia, Iskanbilako kideentzat. "Sindy Berbenas anaiak dira guretzat eta Hankaz Gorakoekin ere oso gustura sentitu ginen atzo. Oso kontzertu ona eskaini zuten, gainera". Hala, aurrera begira ere, Arrasateko taldeekin jotzea gustatuko litzaieke. "Uste dut, taldeen arteko klaseak alde batera utzita, kontzertu zintzoagoak eta naturalagoak antolatu beharko genituzkeela, guztiok maila berean jarrita. Izan ere, gaur egun, faltan sumatzen dut hori. Beraz, guk ildo horretan jarraituko dugu lanean", azpimarratu du Gonzalezek.