Gauerdian aktibatu du Elurteen Udal Protokoloa; izan ere, Euskalmetek iragarri duenez izotza izango da egunotan, eta asteazkenerako, elur maila 400 metro inguruan. Arrasateko Udalak jakinarazi duenez, protokolo horren helburu nagusia da zirkulazioko bide nagusietan elurra ez pilatzea eta trafikoa ibiltzeko moduan uztea, eta horretarako, "erabilgarri dituen baliabideak erabiliko ditu".
Udaletik aditzera eman dute "programa espezifiko bat" ezarri dutela beharrezkoa balitz, larrialdietara eta osasun zentroetara, industrialdeetara, ikastetxeetara, zentro ofizialetara eta beste zerbitzu batzuetara iristeko bideak libre uzteko. "Egunerokoak betiko funtzionamendua izatea da helburua, ahal dela elurrak eta izotzak eragiten dituen ustekabeak-eta ez izateko".
Elurteen aurrean, hainbat aholku eman gura izan dizkiete herritarrei Udaletik; hona hemen horiek:
- Ahal dela ibilgailu pribaturik ez erabiltzea, eta autoa hartuz gero, segurtasun distantzia handitzea; frenatzerakoan, ez egin bat-batean.
- Kalean aparkatu ohi diren ibilgailuak garajeetan gordetzea.
- Oinezkoak espaloitik ibiltzea, eta, kaleak gurutzatzean, kontu handiz egitea.
