Tronboi-jotzailea da Unai Urrecho arrasatearra, eta EGOren sorreran aritu zen musikari. Egun, besteak beste, Hego Koreako Suwon unibertsitateko orkestrako zuzendaria da.
EGOko zuzendariek bi pieza interpretatuko dituzte: Rossini konpositore italiarraren Obertura La gazza ladra eta Brahms musikari alemaniarraren 4.Sinfonia. Emanaldiei dagokienez, berriz, bihar Tolosan izango dira; urtarrilaren 2an, Donostian; urtarrilaren 3an, Gasteizen, eta urtarrilaren 4an, Bilbon.
Duela astebete hitz egin zuen Urrechok GOIENArekin eta hark gazte orkestren garrantzia azpimarratu zuen: "Gazteentzat aukera oso ona baita beste musikari talentudunak eta maisu berriak ezagutzeko; baita errepertorio interesgarriak lantzeko ere". Haren hitzetan, orkestra gazteak "giza baloreak lantzeko" balio du. "Beraientzat aukera polita da besteekin batera jotzen eta besteak errespetatzen ikasteko, musikari on bat izateko enpatizatzen jakin behar da eta".
