Aitor Montes Aramaioko medikuak urte asko daramatza bere lana euskaraz egiteko eskubidea aldarrikatzen eta bere pazienteei osasun zerbitzu integrala euskaraz bermatzeko ahaleginetan. "Ahalegin horrek askotariko jazarpenak jasan behar izatea ekarri dio Montesi: kargu hartzeak, mespretxuak, mehatxuak... Duela egun batzuk gertatu zen azkena. Paziente baten larrialdietarako deribazioa euskaraz idazteagatik kontuak eskatzeko deitu zioten Arrasateko larrialdi zerbitzuetatik eta, gertaera salatzeko, ospitaleko zuzendaritzara jo zuenean ez zuen haren babesa jaso", salatu dute.
Horren aurrean, Euskaldunon hizkuntza eskubideen aldeko Arrasateko protokoloa sustatzen duten eragileek honako hau adierazi dute: "Aitor Montesek zerbitzua euskaraz emateko daukan eskubidea aldarrikatzen dugu, eta gure babes osoa helarazten diogu eskubide horren defentsan urte luzez aurrera eramaten ari den borrokagatik eta jasaten ari den jazarpen egoera onartezinengatik; Debagoieneko ESIko zuzendaritzari gogorarazten diogu erakunde publikoen betebeharra dela euren zerbitzuak euskaraz eman eta jasotzeko eskubidea bermatzea; Debagoieneko ESIko zuzendaritzari eskatzen diogu publikoki babestu dezala Aitor Montesek, zein zerbitzu publikoetako beste edozein langilek, lana euskaraz egiteko daukan eskubidea eta publikoki salatu ditzala euskaraz aritzeagatik jasaten dituen erasoak".
Modu horretan, Aitor Montesi elkartasuna eta babesa adierazteko elkarretaratzea deitu dute abenduaren 1erako. Hala, 13:00etan ospitale aurrean elkartuko dira.
