Arizmendi ikastolako Derrigorrezko Bigarren Hezkuntzako hirugarren mailako ikasleek jakinarazi dutenez, argazki erakusketa bat egingo dute asteon herrian, "jendea sentsibilizatzeko eta arazoa hobeto ulertzeko" asmoz. Pankartak ere jarriko dituzte Palestinako herria pairatzen ari den egoera salatzeko, eta baita QR kodeak ere informazio gehiago eskuratzeko. Horrez gain, janari bilketa egingo dute bihar, Arrasateko puntu ezberdinetan.
Hain justu, Arrasateko Eroski supermerkatua izango da janaria biltzeko lekua, eta baita Musakolako Lidl eta BM ere; are gehiago, San Andresko BM supermerkatuan ere egongo da horretarako aukera. Arroza, olioa, ura, lekaleak eta kontserbak jasoko dituzte 14:30etik 16:30era bitartean, eta Zaporeak proiektura bideratuko dute bildutakoa.
