Arrasate Rugby Taldeak lehia gogorra izan du Rugby Club Riojaren kontra. Hasieran, errioxarrak nagusi izan dira meleetan, baina hain zuzen ere, meleak ari dira izaten arrasatearren indargune liga osoan, eta lortu dute egoerari buelta ematea.
Etxekoak hasieratik markagailuan aurretik ibili arren, 17-17 berdintzera iritsi dira. Nolanahi ere, ostikada batekin eta entsegu batekin, aurretik jarri eta hala bukatu da partidua: 25-17.
Xabier Gardoki kapitainaren esanetan, "oso garrantzitsua" izan da gaur irabaztea: "Gaurko garaipena taldean lan egitearen emaitza da. Lan handia egin dugu".
Eibar izango da datorren asteburuko aurkaria. "Uste dugu lortuko dugula irabaztea, eta hala bada, gogoz ekingo diogu bigarren bueltari", azaldu du kapitainak.
