Arrasateko Margo Taldeak gaur inauguratuko du 104 obrak osatutako margo erakusketa, Kulturaten; abenduaren 9ra arte ikusgai izango dira margoak, astelehenetik larunbatera, 17:30 eta 20:30 bitartean. Aurkeztuko den erakusketak 18 margolarik 2023an egindako lanak batuko ditu erakusketan, eta bertan izango dira obra guztien egileak.
Obra gauzatzeko erabiltzen diren teknikak askotarikoak dira; akrilikoak, olioak, akuarelak, teknika mistoak eta collageak ikus daitezke, besteak beste. AMTko Jose Angel Iturbek erakusketa kolektibo hau "denboran zeharreko bidaia batekin" alderatu du: "Hainbat mugimendu artistikotan zehar egindako bidaia izan liteke –kostunbrismoan, fauvismoan, inpresionismoan, surrealismoan, kubismoan, abstrakzioan eta errealismoan zehar, besteak beste–".
