Maiatzetik ari ziren kontu honekin bueltaka bai Arrasate Musikalekoak eta baita Alberto Urretxo tronboi-jole arrasatearra ere, eta azkenean, ospatu dute Euskadiko tronpeta-joleen topaketa. Goizean goizetik hasita, ekintza ezberdinez jositako eguna izan zuten bai tronpeta ikasleek baina baita haizezko instrumentuen doinuez gozatzeko gogoa zuen edonork; kontzertuak edo hitzaldiak izan zituzten entzungai, esaterako.
Eguneko ekintza nagusia arratsaldean izan zen Juan Arzamendi Musika Etxean. Lehenik eta behin, Musikeneko tronpeta ikasleek haien irakasle Luis Gonzalezekin batera, 20 bat minutuz pieza ezberdinak eskaini zizkieten bertaratu zirenei, eta, amaitzeko, Euskadi Brass taldeak ere emanaldia eskaini zuen. Edorta Aiastui –Arrasateko Musikaleko irakaslea– eta Alberto Urretxo "oso pozik" agertu ziren topaketa Arrasatera ekarri izanagatik. Gainera, Urretxok goraipatu egin nahi izan zuen Aiastuik herrian egiten duen lana: "Edorta Aiastuik hogeita hamar bat tronpeta ikasle ditu, eta hori ez da oso ohikoa izaten. Txalotzekoa da berak Arrasaten egiten duen lana".
