Gizonezko Ohorezko Erregional mailako Mondra eta Antzuolaren arteko derbia jokatu zen zapatu arratsaldean Mojategin; arrasatearrek partidu erraza izango zela aurreikusi zuten arren, ez zuten irabazitzat jo derbia amaitu arte.
Berehala aurreratu zitzaien antzuolarrei etxeko taldea, Iker Perezen golarekin bigarren minutuan, eta hortik gutxira iritsi zen bi eta hutsekoa, 15.minutuan Iñigo Arizmendiarrietaren golarekin. Bi goleko aldearekin iritsi ziren atsedenaldira taldeak, eta partida amaitu aurretik iritsi zen hirugarren eta azken gola Aitzol Bengoaren eskutik 80. minutuan.
Hala, partida guztiak irabazita, lehenego postuan mantentzen da Mondra, aldiz sailkapeneko azken postuan jarraitzen du Antzuolak.