Pandemiako testuinguruan sortu zuten Ziorla Fest jaialdia Musakolan, 2021ean, jaiak behar bezala ezin ospatuta, auzoan itzalita zegoen bizitasuna berreskuratzeko. Maiatzeko San Isidro egunaren bueltako jaiak baitira ezagunenak, baina urtean zehar ere saiatzen dira kultur ekintzak antolatzen. Jai batzordeko Beñat Apraizek azaldu moduan, "gustatzen zaigu Musakola kolorez betetzea, eta horretantxe jarri ditugu indarrak oraingoan ere".
Zuzeneko musikaren aldeko apustu sendoa egin dute, asteburu osoan zehar egongo baita zer entzun eta zer ikusi. Gehien bat emanaldi akustikoak nagusituko dira tabernetan, Arrasateko musikari eta talde ezagunenak: "Herriko artistei plaza eskaintzea ere badelako helburua". Gaztetxoengan ere pentsatu dute, DJ Goiko disko-festa egitera gonbidatuta. Hori zapatu arratsaldean izango da. Segidan, Sanisidrock plazako karpan, distortsioz betetako kontzertuak hasiko dira: Hauek azkoitiarrak, Oihu! aretxabaletar eta eskoriatzarrak, Zeker elorriarrak, Suzio 13 madrildarrak eta Des-kontrol arrasatearrak igoko dira oholtzara. Hotza edo euria eginez gero ondo babestuta egongo da publikoa, jaietan jarritako karpa bera, 40x10x4 metrokoa, izango baitute aterpe.
Asteburu bete-betea dator beraz. Ziorla Fest auzo guztira hedatuko da bigarren aldi honetan, eta nork daki hirugarrenak auzoko mugak gaindituko dituen: "Ea antolatu dugun jaialdi hau ondo irteten den; hala balitz, hurrengo erronka egindakoa hobetzea izango da", borobildu du Apraizek.