Goizeko hamarretan puntuan atera da Alzola herriko plazatik. Bidean eta tontorrean lagunak izan ditu animoak ematen. "Polita izan da eta emaitza ere ona izan da", azaldu du. Bazekien 40 minututik beherako denbora oso denbora ona izango zela eta lortu du.
Sasoi onean dago Alzola. Urriaren 7an, Anbotoko kilometro bertikalean lehenengo postuan geratu zen. Arrasatekoak 40 minutu eta 3 segundotan geratu zuen erlojua, eta 9 segundo atera zizkion bigarren egin zuen Aitor Ajuria gatzagarrari. "Anbotokoaren ostean pozik nengoen egindakoarekin eta Udalatxeko erronkarekin proba egitea erabaki nuen", azaldu du.
Ez da Udalatxeko igoeran bere burua proban ipini duen lehen aldia. "Duela bost urte 37 minututan igo nintzen lehenengo gurutzera. Gaur ez naiz handik igaro, baina igaro izan banintz orduan baino azkarrago helduko nintzateke, hobeto nenbilen". Gaurkoarekin, Arrasate eta Udalatx uste baino gertuago daudela frogatu du Alzolak.