Dokean jokatzeko asmoz, hamar andre inguru batu dira goizeko hamaiketan Arrasateko Zaldibar frontoiaren alboan dagoen zelai batean. Jokoaren azalpen xumea jaso dute lehendabizi, eta teorian ikasitakoa praktikan jartzen aritu dira ondoren. Izan ere, bi elkarteetako kideen arabera, Arrasaten "bizirik" dago dokea, "baina orain arte, soilik, gizonezkoek jokatu dute"; beraz, uste dute horri buelta emateko unea dela.
Hamar metro luze eta bi metro zabal izan ohi ditu joko eremuak normalean, baina moldaketak egin dituzte gaurkoan; hala, bost metro luze eta bi zabal izan dituzte jokoan aritzeko. Era horretan, helburua da lurrean sartuta dagoen labana ukitzea fitxarekin; lortuz gero, bost puntu eskuratzen dira.