Bularra eman eta lan egin: egin dezagun posible! leloa izan da aurtengo kanpainako mezua, eta, hala, edoskitzea eta lana uztartzea izan dute hizketagai, Osakidetzatik abiatutako programaren arabera, emakumeek ez luketelako aukeratu behar haurrari bularra eman edo lan egitearen artean. "Edoskitzea emakumeen eta haien haurren berezko eskubidea da; eskubide hori babestea haien ugalketa-eskubideak eta osasuna babestea da".
Dozenaka lagun elkartu dira Biteri plazan eginiko ekintzan, eta gai hortaz hitz egiteaz gain, edoskitzearen gaineko informazioa jasotzeko aukera izan dute, hala nola esnea nola atera jakiteko pautak, edoskitzea eta elikadura osasungarria bateragarri egiteko trikimailuak eta edoskitze taldeak.
Edoskitze tailerrak
Debagoienean lau herritan egiten dituzte edoskitze tailerrak, eta parte hartu nahi izan ezkero aski da osasun etxera deitu eta izena ematea. Hain justu, Arrasaten, astelehenean egiten dituzte saioak, 11:00etatik 12:00etara; Bergaran, berriz, martitzenetan, 10:00etatik 11:00etara; Aretxabaletan, eguenetan, 10:30etik 12:00etara; eta Oñatin, 10:30etik 12:00etara, egubakoitzetan.
