Natale Armendariz, Maite Armentia, Oier Bengoetxea eta Itziar Sanchez dira Magma izeneko lanaren egileak, eta horri esker eskuratu dute garaipena. Nabarmendu dutenez, "diseinu erakargarria, ergonomikoa eta metagarria" duen proteina pote bat da, eta era horretan helburu dute jasangarritasuna eta banaketa erosotasuna bermatzea. "Izan ere, berriz betetzeko ontzi zehargarri eta monomateriala da, %100 plastiko birziklatuz eta birziklagarriz egina eta estetikaren aldetik, minimalista eta erraz metatzeko aukera ematen duena".
Bengoetxeak azaldu duenez, "ilusio handia" egin die sariak, eta "poz-pozik" daude. "Oso jende gutxik lortzen du horrelako zerbait, eta litekeena da lorpen hori curriculumean lagungarri izatea lana bilatzeko orduan". Gainera, erantsi du "giro atsegina" izan dutela taldekideek diseinuaren prozesu osoan, eta "erraz" egin dutela lan. "Ez genuen uste maila horretako lehiaketetan halako harrera ona izango zuenik".
