Gomiztegi artzain eskolan ikasi zuen ogibidea Mikel Velascok. Ardien ilea mozteko Australian erabiltzen den teknika darabil, eta gaur, Garagartzan, erakustaldia eskaini du, Iñaki anaiaren laguntzarekin. Udaberri aldean ibiltzen da halakoak egiten normalean, baina sanmigeletan salbuespen bat egin du, gonbidapena gustu handiz onartuta. Artile mozketak interes berezia piztu du eguerdian auzora bertaratu direnen artean.
Bazkaria eta gero irrintzi lehiaketa egin dute, eta bingoan jokatu. Bien bitartean, Zabolain zalditegiko animaliekin hara eta hona ibili dira Olazar zelaian neska-mutilak.
Arratsaldea Aramaio eta Arrasateko bertsolarien saioarekin borobilduko dute. 22:00etan, lamia etorriko da, eta DJ Goikoleak abestiak jarriz girotuko du egunaren hondarra.
