Arrasateko Udalak eta Ekin Emakumeak Elkarteak martxan dute Auzokoren ikasturte berria. Herritarrak, aniztasuna eta euskara oinarri dituen egitasmoa da Auzoko eta helburu nagusia da, euskal hiztunen laguntzarekin, herrira iritsi berriek edota euskaratik urrun bizi direnek euskarara gerturatzeko lehen pausoak ematea. "Horretarako, gure herriko hizkuntza aniztasuna ezagutarazi eta jatorri ezberdinetako herritarrak harremanetan jartzen ditu proiektuak", diote Ekinetik.
Eguenetan elkartuko da taldea, ordu eta erdiz, hainbat ekintzaren bidez, euskarazko oinarrizko hitzak ikasi eta elkar ezagutzeko. Urriaren 19an hasiko dira elkartzen eta herritarrei dei egin diete parte hartzeko, "guztiok garelako beharrezkoak herriko komunikazio eta kohesio hizkuntza euskara izateko".
