Arte garaikidea herrietara gerturatzeko helburua duen Harriak programaren baitan sortu dute Guacamayo erakusketa. Ander Perez artistak egin ditu komisario lanak eta aitortu du, berarentzat lehenengo esperientzia izan dela roll horretan. "Asko ikasi dut", azaldu du.
Artistak lau dira, "guztiak espazioarekin lan egiten dutenak", eta lanak hiru, izan ere, Miel Oyarzabalek (Durango, 1994) eta Ibai Madariagak (Mallabia, 1994) hiru urte daramatzate kolektibo gisa lanean. "Guk estudioan erabiltzen ditugun materialak ekarri ditugu, egurra, orriak... eta horiekin lan egin dugu honako espazioan", azaldu dute. Dimentsio handiko lan bat aurkeztu dute Kulturaten.
Eurez gain, Victor Ortuñok (Yecla, 1995) eta Silvia Coppolak (Padova, Italia) ere ipini dituzte euren lanak erakusketan. Coppolak soinuarekin jolas egin du erakusketan eta soinu-obra bat sortu du. Ortuñok, berriz, tamaina txikiagoko hiru sorkuntza ekarri ditu.
Erakusketa ikusteko
Urriaren 6an itxita egongo bada ere, astelehenetik zapatura dago erakusketa ikusteko aukera, 17:30etik 20:30era.
Irailaren 28an, bestalde, 19:30ean, Paula Guerreroren kontzertua egongo da, klaustroan bertan.