Ohi moduan, bigarren eta hirugarren zikloko ikasleek hartuko dute parte. Aurten bi ibilbide egingo dituzte; batak, erdigunetik abiatuta (Biterin 08:30ean) Arbolapetaraino joanez bidegorria hartuko du Monterron parketik barrena. Beste ibilbideak San Andresetik irtenda (09:40ean Kurtzetxiki plazan) Erguinerantz hartuko du Arrasate pasealekua zeharkatuz.
Hasierako puntu horietan Udalako Ingurumen Eskolako irakasleak egongo dira, haurrak jaso eta eskolaraino bidean laguntzeko. Dena den, ibilbidean zehar bizi diren lagunak taldera batzeko aukera izango dute. Parte hartzeko ikasleek izena eman beharko dute irailaren 14 baino lehen, eta parte hartzaileen artean saritxo batzuk banatuko dituzte astearen amaieran.
Oinez mugitzea garrantzitsua dela ohartarazi dute ingurumen eskolatik. "Batetik, motordun ibilgailuek sortzen dituzten inpaktuak (zarata, berotegi efektuko gasen isurketa, istripu arriskua...) murrizteko, eta bestetik, modurik osasuntsuena delako aire zabalean mugitzeko. Gainera, gure herria jasangarriagoa eta atseginagoaren alde egiteko modu bat ere bada. Honela, Arrasateko Udalak irailaren 16tik 22ra herriko autobusa doan jarriko du".
