Jeltzaleek salatu dute EH Bilduren Udal Gobernuak eta, batez ere, Maider Morras alkateak ez zuelako parte hartu. "Herritar guztiak ordezkatzen ditu alkateak eta herritarrak harrituta agertu dira bere jarrerarekin", azaldu dute jeltzaleek. "Pena sentitu genuen. Ez aurresku, ez txistulari eta ezta Arrasateko bandera ere ez genituelako bertan ikusi. Udalak aukera eman beharko luke ohiturekin eta tradizioekin jarraitzeko", diote.
Gobernuak joan den astean azaldu zuen Arantzazura ez joatearen zergatia. "Udalerrian kristautasunaz harago beste erlijio batzuk ere badaudela iritzita eta neutraltasunaren izenean, parrokoarekin adostu dugu harrera ofizialik ez egitea udal moduan eta harrera hori parrokoak berak egitea", zioen.