Azaroan jokatuko dute Turkian Nahia Irazola eta Uxue Azkue arrasatearrek gimnasia aerobikoko Europako Txapelketa. Herrialde askotako talderik onenak batuko dituen txapelketa da, eta "udatik entrenatzen buru-belarri" aritu direla diote arrasatearrek. Aurretik estatu mailako txapelketetan parte hartu izan duten arren, "horrelako maila duen txapelketa batean" parte hartuko duten lehenengo aldia izango da Irazola eta Azkuerentzat.
Diru-laguntza beharra
Maila horretako txapelketa batean parte hartzeak dakar ekonomikoki esfortzu handia egin beharra. Aitortu dute klubak ez duela "nahikoa diru txapelketako gastu guztiak ordaintzeko", eta beraz, "diru-laguntza baten beharrean" daudela. Bidaiak, estantzia, materiala, lizentziak... asko dira ordaindu beharreko gastuak, eta arrasatearrek diote "gastu horiek guztiak ordaintzeko laguntzak bilatzen" ari direla.
Edozein diru-laguntza "asko eskertuko" luketela ere adierazi dute; edonork bere aletxoa jarri nahiko balu, beraiekin zuzenean kontaktuan jarri edo klubarekin kontaktuan jarri beharko litzateke.
Azken orduko lesioa
Udan zehar taldekide batek belaunean min hartu zuen eta ezin izango du txapelketan parte hartu. Hori dela eta, ordezko batekin jokatu beharko dutela diote gimnastek: "Triste gaude txapelketan parte hartu ezin izango duen taldekideagatik. Hala ere, gogo askorekin goaz Turkiara eta daukagun guztia emango dugu maila on bat eskaini eta etxera pozik itzultzeko".