Arrasateko musikariak kide dituen Neomak musika taldeak uda emankorra izan du iazko martxoan argitaratutako diskoa askotariko txokoetan "arrakastaz" aurkezteko aukera izan du- eta. Udazkenari ere indartsu ekingo diete, horren erakusle, urriko lehen hamabostaldian Hego Koreako eta Japoniako musika jaialdi "ezagunetan" parte hartuko dutela.
Bost kontzertu
Seulen, Hego Koreako hiriburuan, egiten duten Zaindari festa ezagunean ekingo diete birari. "Showcase erako kontzertu bana eskainiko dute Asiako eta mundu osoko programatzaileen eta musika arloko langileen aurrean, eta, ondoren, hango Musinsa Garage areto mitikoan Basque Night edo Euskal Gaualdia izeneko ekimenaren baitan izango dira. Fight for rights jaialdian borobilduko dute Hego Koreako bira", azaldu dute Mauka Musikagintzatik.
Japoniara joango dira ondoren eta bina emanaldi eskainiko dituzte euskal ordezkaritza zabala izango duen beste bi jaialditan Euskal Herrirako bidea hartu aurretik.
