Izen berriarekin –Oreixe Akustikoak– eta toki eta ordu alda- ketarekin –Juan Arzamendi Musika Etxeko auditoriumean, 19:30ean–, baina aurreko hamalau aldietako izaera berarekin, hau da, "formatu txikiko musika formazioak eta eskualdean ez-ohiko musika eskaintza aberasteko helburuarekin" abiatuko du Arrasateko Udaleko Kultura sailak gaur, egubakoitza, bi asteburutan banatuta, eskainiko duten sei kontzerturekin osatutako sorta.
Nafarroako Oronoz herriko Olaia Inziartek zabalduko du hamabosgarren musika zikloaren egitaraua. "Modu baten definitzearren, pop iluna egiten du nahiz eta askotariko estiloen nahasketa ere baduen. Gaztea bada ere, eskarmentua du musika arloan, hainbat taldetan ibili izan da aurrez, eta iazko Durango Azokan aurkeztu zuen berak sinatutako estreinako lana. Hirukote akustiko formatuan dator. Zaleen artean jakin-mina sortu du, horren erakusle sarreren aurre salmenta oso ondo doala. Emanaldi guztietarako sarrerak bost eurotan daude Arrasate.eus atarian eskuragarri eta guztiak agortu ezean, kontzertuen egunetan, aretoan", azaldu du Arrasateko Udaleko Kultura teknikari Karmelo Alberdik, asteon, Arrasate Irratian.
Sara Azurzaren laukotea, bihar
17 urte zituela eta Lauroba anaiak lagun, igo zen oholtza gainera estreinakoz bihar JAMEko auditoriumean lekukoa hartuko duen Sara Azurza donostiarrak. Uztailean Oñatiko Santana antzokian eskaini zuen kontzertuko oroitzapen goxoekin "gogotsu" dator urtarrilean argitaratu zuen Hemen berriro diskoa aurkeztera. Hala kontatu du Arrasate Irratian: "Asko gustatu zait eskaintza orokorrean; plazera da Olaia Inziarte eta Verde Prato moduko artista handiekin kartela partekatzea". Soul, funk, pop, elektronika eta bestelako doinuen nahasketa eskainiko du laukote formatuan.
Domekan, bikote txiletarra
"Formazio bitxiak" ezagutzera ematea du helburu Arrasateko Udalaren ziklo akustikoak eta oraingoan ere hala dela dio Alberdik etzi, domeka, izango diren Emilia y Pablo bikotea aurkezterakoan. "Txilekoak dira, baina Madrilen bizi diren eskarmentu handiko artistak dira. Antzerkigintza eta performance diziplinatik datoz eta musikari dagokionez, nahasketa bitxia eskaintzen dute, hau da, folklore latinoamerikarraren eta flamenkoaren nahasketa".