Arrasateko EAJ-PNV Arantzazura joango da domekan eta, tradizioa jarraituz, harrera egingo die erromesaldia egingo duten herritarrei. Mezara ere joango dira ordezkari jeltzaleak. "Urteetako ohitura da igandeko erromesaldia, eta guretzat funtsezkoa da ohitura horiek bizirik mantentzea, gure historia eta kulturaren zaintzaren mesedetan, hain zuzen, ohitura edo tradizio horiek direlako iragana eta oraina batzen dituztenak eta belaunaldiz belaunaldi transmititzen direnak", diote jeltzaleek.
Era berean, EAJk "penaz" hartu du EH Bilduko Udal Gobernu berriak igandeko ekitaldian parte hartu nahi ez izana eta, ondorioz, erromesaldia egiten duten herritarrei harrera ez egin nahi izana, haien esanetan. "Igandean arrasatear asko izango dira Arantzazun eta alkatea zein Udal Gobernuko kideak bertan ez izatea penagarria da, tradizioari uko egiteaz haratago, bertan izango diren arrasatearrei ere bizkarra emateko modua ere badelako. Alkatea herri guztiaren ordezkari da eta ez zati batena bakarrik", gehitu dute.
Edozelan ere, Gobernuak gezurtatu egin du hori. "Udalerrian kristautasunaz harago beste erlijio batzuk ere badaudela iritzita eta neutraltasunaren izenean, parrokoarekin adostu dugu harrera ofizialik ez egitea udal moduan eta harrera hori parrokoak berak egitea", azaldu du Udal Gobernuak.
