Irailaren 6an, eguaztena, abiatuko du 2023-2024 ikasturtea Arrasate Aikido Taldeak eta ate irekien jardunaldiak egingo dituzte. Hala, 17:30etik 18:30era haurrei zuzendutako saioak egingo dituzte eta 18:30etik 20:00etara, aldiz, helduei zuzendutakoak.
Ikasturteko ordutegiei dagokienez, iazko berdinak izango dira; hau da, astelehen eta eguaztenetan egingo dituzte saioak, 17:30ean haurrek eta 18:30ean helduek.
Haurren klaseetan, aikidoa bere osotasunean landuko dute, baita psikomotrizitate eta meditazio ariketak ere. Helduen saioetan, bestalde, honako arlo hauek landuko dituzte: aikido poliziala, aikibudoa, jiu-jitsu artearen oinarriak, arma zurien erabilera (jo, bokken, tanto...) edota meditazio ariketak.
