Maila guztietako jendea egon da dantzaldian, bluesa dantzatzen eskarmentu handia duena zein ia pausorik ez zekiena. Edozelan ere, giro ederra nagusitu da eta saioko gidariak oso gustura azaldu dira. "Ikusi dugu jendeak oso ondo pasatu duela eta hori da inportanteena", dio Salgadok.
Bluesa eta jazza musika klasiko beltza dela azaldu du eta hortik datozela beste generoak ere. "Entzun bezain laster, mugitzea eskatzen dizu gorputzak eta aurpegian irribarre bat zabaltzen zaizu".
Lazy Blues taldeko kideak ohituta daude dantza klaseak ematen, baina talde txikientzat eman ohi dituzte. "Gaurkoa moduko saioak ez ditugu egiten normalean, baina oso aberasgarria izan da guretzat ere". Era berean, balio handia eman dio Arrasate Blues jaialdiari. "Disfrutatzeko jaialdia da".
